Mît hi Thin (liver)-ah a bei avangin Mît Cancer-ah hian Mît bakah Thin eng emaw chen Segment 4B&5) paih tel a ngai thin a, hei hi ZMC-ah Hepatobiliary Surgery an zai tanna a lo ni ta a. General Surgery Department hnuaia zai leh enkawl niin, ICU leh hnimhlum lam, Anaesthesiology Department leh Department pawimawh dangte nen tang kawpa enkawl thin a ni.

Zoram Medical College (ZMC)-ah hian tunlai khawl changkang tak tak an nei a, a hmang thei doctor-te pawh training ten an kal nasa hle a. Tata Memorial Hospital, Mumbai-ah pawh Thin Cancer zai chungchang training in an kal a. Tun tumah hian Mizoram-a la zai ngai loh Thin (Liver) Cancer Zaipui (Major Liver Resection) hi an thei ta a. Thin vei lam pumpui paih (Left Hepatectomy) a ni a, Thin vei lam chawmtu thisen zampui hrang hrang (Left portal vein, Left Hepatic Vein, Left Hepatic Artery) te uluk taka lak a ni a, Thin atang Mît tui luanna (Left Hepatic Duct) chu uluk taka tawn a ni bawk. Thin zai hi a thi duh em em a, thisen zam a tam avangin a hlauhawm bik em em a ni.

Khawl changkang tak Water Jet (Tui Phuh Chakna hmanga Inzaina) hmangin Thin cancer hi an zai a, hei hian nasa takin Surgeon-te a pui a. Thisen chhuak nasa lutuk turte vengin zai dan chin turte hmuh a ti awlsam em em a, Argon gas hmang- Argon Plasma Coagulation (APC) khawl hmangin thin zai tawh lai chu an kap sawr leh a, hei hian thi put tur tam tak a veng a ni. Thin Cancer hlawhtling taka zaitu team te hi Surgeon Dr. Samuel Lalhruaizela, Associate Professor leh Assistant Surgeon Dr. Willie Lalhruaitluanga, Assistant Professor, Department of Surgery-te an ni a, Head of Department-te rawn chungin tha takin an zai a ni. Anni bakah hian Junior Doctor leh Nursing Staff thiam tak takten an pui a, ICU lamah Anaesthesiology team ten damlo te hi tha tak leh uluk takin an enkawl bawk a ni.

ZMC-ah hian cancer chi hrang hrang an zai nasa em em tawh a, damlo tam takin Doctor-te kaltlangin Pathian tihdamna an chang tawh nghe nghe a. Golden Card hmangin a thlawn vekin damlote hi enkawl an ni a, heng bakah hian Healthcare leh sawrkar MR bill theih zawng zawng pawh kalpui mek a ni bawk.